„Platt maakt“
Platt maakt Harten open
In ihrer Kolumne „Platt maakt“ erzählt Insa Schindler von der plattdeutschen Sprache – die Herzen öffnen kann.
De Drööm van dat moje Levend in Oostfreesland verdunkert sük faken. „De Lüü proten hier ja blot Platt. Dat verstah ik nich!“ Plattdüütsk van Grund up an to lehren, daarvan willen se eerst nix weten. Well in ‘t Utland will, för de is dat heel natürelk, Vokabels to lehren un sük mit de frömde Spraak utnanner to setten. Man de Kopp roken to laten för en gode Naberskupp? Daarbi is dat Plattdüütsk-Lehren vandage en Bült lichter as fröher: De Volkshochscholen beden Kursen an. Dat gifft interessant Lehrboken.
In ‘t Internet kann man sük anhören, wo wat utproot word. Un siet Mai 2021 gifft dat mit „PlattinO“ sogaar en Spraaklehr-App för Plattdüütsk. Elke Brückmann van ‘t Plattdüütskbüro hett de siet 2019 entwickelt. Mit de utdocht Famillje Janssen ut Auerk lehrt man de Olldag up Platt kennen. 1300 Upgaven in 40 Lexen un 1700 Audiodateien brengen een up dat Sprakenniveau A1, wenn man flietig öövt. Un dat kann man to elke Dages- un Nachttied, egaal war man nettakkeraat is. Elk dürt sien egen Tempo daarbi bestimmen. Dank de Stöön van verscheden Organisationen kann man de App köstenlos bruken.
Över de Moderspraak en Togang to Minsken to kriegen, is nich blot in d‘ Naberskupp wichtig. För Christianne Nölting van dat Länderzentrum för Nederdüütsk hett dat ok bi de Pleeg van Ollen un Kranken en grote Bedüden. Se denkt an en Perser: In ‘t Altersheim was he toeerst mit sien open Aard dat Hartje van allen. Man siet en Slaganfall leevde he blot noch in sien egen Welt un brabbelde för sük hen. Dat dochen tominnst sien Pflegers. Man en Lehrwicht mit oostelke Wuddels verklaarde hör, dat de Mann in Farsi, sien Moderspraak, prootde. Umdat hum nüms verstunn, was he över en lange Tied eensaam.
Wenn se hör Moderspraak hören, föhlen sük Minsken burgen. Dat was ok bi mien Oma so. Blot Pleegsters, de hör up Platt anprootden, kunnen good mit hör klaar worden. Van all annern kunn of wull se sük nix seggen laten. Kien Wunner: Well nich mehr kieken un nich allto best hören kann, verlett sük lever up een, de de glieke Spraak proot.
Nölting freit sük, wo good hör Webinaren annohmen worden. Hör Kolleg stunnen futt to Anfang de Sweetdrüppen för de Kopp: „Nu schicken de mi fiev Russen to ‘t Plattlehren! Wo sall dat angahn?“ Man dat leep heel wunnerbaar. Ik stell mi de eerste stökelige Gespreken mit de Patienten vör: „Wo geiht di dat?“ Platt mit rüssische Akzent! Dat hett seker för so mannig verwunnerte Blick, Smüstern, aver ok för Anerkennen sörgt. De sülvke Spraak to proten, lett dat Hart open gahn.
„Mien Gott, he kann kien Plattdüütsk (mehr)“
Wat he’ wi lacht bi de Witzen van d’ KI
Plattdüütsk sünner Tradition?
