„Platt maak“t
Up dat Steenfelderfeld-Feld-Feld
Was hat es nur auf sich mit dem Steenfelderfeld-Feld-Feld? Die Antwort liefert Wilko Lücht in der Kolumne „Platt maakt“.
In ‘t Leven geiht ‘t faken to as bi Sisyphus, de in de Unnerwelt unnerratts en grote Steen en Barg hoogrullen mutt, de alltied futt weer andaalgliddt. Of ‘t geiht so to as in disse Geschicht: „Dat was eenmaal en Vader, de harr söven Kinner. De Kinner seen: ‚Vader, vertell uns en Loopje!‘ Do fung de Vader an: ‚Dat was eenmaal en Vader, de harr söven Kinner. De Kinner seen: Vader, vertell uns en Loopje! Do fung de Vader an...“ Un so wieder un so wieder.
So wat gifft ‘t ok bi Logen. Futt achter Steenfeld in ‘t Overledingerland liggt Steenfelderfeld. In Steenfelderfeld is en Footballfeld, also dat Steenfelderfeld-Feld. Un up dat Steenfelderfeld-Feld is weer en lüttjet Feld (dat Steenfelderfeld-Feld-Feld), waar de Rasen verneelt is. En Lidd van ‘t Footballvereensvörstand sett sük in d‘ Kopp: Dat mutt ik utbetern! He snappt sük en Spaa un fangt an t‘ graven. Man he hett de Platzwart nich Bescheed seggt. De kummt eventürelk vörbi un schellt dat Vörstandslidd baldadig ut.
Well regelmatig Youtubevideos kieken deit, de weet, van well ik proot: Udo Tesch, de Platzwart, un Wilke Zierden, dat Vörstandslidd van de Vereen SuS Steenfeld. Wilke hett de Rasen mit Fliet opengraven un ok mit Fliet Udo d’r in vörn nix van seggt. Denn Wilke weet: Wenn ik vileinige Saken maken doo un film Udo d’rbi, wo he sük upregen deit, denn brengt dat Klicks. Bit to en halve Million för elk Video.
De Videos lopen alltied in desülvige Maneer of: Wilke stellt Udo duddige Fragen of bruukt hum vernarr. Un Udo geiht in d‘ Lücht. Egenlik alltied datsülvige. Haast as bi Sisyphus. Of bi dat Loopje van de Vader un de söven Kinner. Passt ja, se sünd ja up dat Steenfelderfeld-Feld-Feld. Mit anner Woorden: Udo un Wilke sünd sük troo bleven. De Rullen sünd ok vandaag noch nett so verdeelt as bi dat eerste Video, as de beid noch nüms kennde.
In Tüskentied hett Wilke noch mehr Youtube-Kanalen start: In een Kanaal geiht dat um de Wurackeree an Wilke sien Fehnhuus. Wenn Udo kummt to helpen, weten wi, wo ‘t oflopen deit. In en anner Kanaal vertellt Wilfried, wat Udo sien Bröör is, up Platt (mit Unnertitels) Staaltjes ut sien Leven. Man wenn Udo Wilke up sien Kanaal anbölken deit, denn seggt Wilke: „Nicht so viel Platt reden, sonst muss ich das alles wieder untertiteln!“ Wo Wilke to Plattdüütsk steiht, is tominnst ambivalent.
Man noch, wat sall ‘t: Över dreehunnertdusend Abonnenten proten för sük. Udo un Wilke schieren ‘t, mennigeen blied to maken. Daarum mutten wi uns de beid as bliede Minsken vörstellen.
Vööl Bewegen in de Naberskupp
Dörnanner in Pa sien Staaltje-Kanon
