„Platt maakt“
Novemberelend
Ein Elend, dieser November .- findet Insa Schindler. Warum das nicht nur am Wetter liegt, verrät sie in ihrer Kolumne „Platt maakt“.
De November wiest sük upstünds van sien allerbeste Sied: De Bladen fallen van de Bomen. Allens is gries un grau, düüster, lusig kold un grillerig. Narichten kann man nich mehr hören, ohn Treminnen to kriegen. Corona hett uns weer full to faten kregen.
De Infektionstahlen stiegen un stiegen, man nüms will of kann dörgriepen, um daartegen wat to unnernehmen.As wenn dat all noch nich genoog was, bünd dat ok noch so rare Fierdagen: Güstern was as Bispill weer Buß- un Bettag. Utsuren un beden – passt dat noch in uns Tied?
Fröher was dat wenigstens en freje Dag. De kunn man good bruken, um daar noch en „t“ mehr in to smuggeln un sük dat Betttüg över de Kopp to trecken: en Dag to ‘t Leiwamsen un Verhollen. Geern hett man sük ok mit en Koppel Lü to ‘t Gröönkohleten truffen, de achterna noch begoten worden muss.
Sied 1995 disse Fierdag för dat Betahlen van uns Pflegekasse her hollen muss, mussen wi up disse Traditionen verzichten. Bleven bünd de Gottsdeensten in uns Karken. Man anners as man dat ut de Naam van disse Dag ofleiden kunn, word an disse Dag nich över de Minken to Gericht seten, um hör to Strafen to verdönnern. Nee, an d‘ Buß- un Bettag sallen sük de Minsken en bietje Tied nehmen, um sük to besinnen, to överleggen, wat upstünds good löppt un waar dat an happert.
De Lüü worden inladen, för sük sülvst Bilanz to trecken, schier Lei to maken, umtodenken un en neje Padd intoslahn. Grote Rebeten gifft dat upstünds mehr as genoog: de Umgang mit uns Klima, mit Minsken ut anner Kuntreien of uns Levend mit Corona.
Ik hoop, dat sük so noch en Koppel van Minsken to en Impfung entslut. Lest Jahr um disse Tied was dat Gejammer groot, dat ‘t noch kien Impfstoff tegen disse malle Krankheid gaff. Vandage leven wi immer noch in un mit disse Plaag, umdat unnödig vööl Minsken de Hülp, de anboden word, nich annehmen. Un weer möten all daar unner lieden: OPs un Behannelns worden ofseggt, umdat Intensivbedden in de Krankenhusen mit Corona-Patienten beleggt bünd. Ok van uns nett neei wunnen Freeheiden möten wi bold weer Ofstand nehmen.
Wenn dat ok noch so mooi is, unner Lüü to komen, mutt elk överleggen, of dat upstünds Nood deiht. Blot, wenn all tosammen hollen, wenn nich elk an sük sülvst denkt, bünd wi starker as de Virus.
En Teken för Blau-Geel
Maakt dat Best d’r ut
König van Düütskland – Flöök of Segen?
