„Platt maakt“
Mien eerst Wiehnachten as Heid
Unser Kolumnist Wilko Lücht erzählt, wie er als Kind um ein Weihnachten „betrogen“ wurde. Und nun? Will er seine Eltern verklagen?
Man sall ja nich so vööl van sük proten. Van sük düren blot Lüü proten, de heel wat besünners maakt hebben: To ’t Bispill up de Mount Everest klautern, de Jakobsweg wannern of anners wat. De düren denn driest van sük proten un daar sogaar en Book över schrieven. Well ok noch van sük proten dürd, sünd sülken, de wat Schofels beleevt of en stuur Schicksaal hebben. De Lüü, de dat lesen, intereseert dat, umdat se bliede sünd, dat se so wat Schofels nich sülvst beleevt hebben. Of se fragen sük, wo se reageren deen, wenn se so wat beleven deen. Ok wenn se sük dat nich wünsken. In en bestimmte Fall will ik mi unner disse Lüü reken, denn ik hebb in en Punkt ok en stuur Schicksaal.
Ik bün nu negenundartig, man dat Wiehnachtsfest, wat nu kummt, is eerst mien negenundartigste. Egenlik harr dat al mien 40. Wiehnachtsfest wesen kunnt. Is ’t aver nich. Denn: Ik bün up d‘ 14. November 1982 geboren, man eerst up d‘ 9. Jannewaarje 1983 dööpt. Dat bedüddt: Bi mien eerst Wiehnachten, also Wiehnachten 1982, weer ik noch Heid. Dat heet, mien Ollen hebben mi um mien eerst Wiehnachten brocht. Un dat Leepste is: Nüms hett dat bitlang interesseert.
Normalerwies muss ik mien Ollen verklagen. Ik kunn mi ja nich wehren, ik Blood. Ik weer ja man so lüttjet. Ik kunn ok de Pastoor verklagen. Villicht harr de gien Dööpterminen mehr freei, umdat in d‘ Harvst so vööl Kinner geboren worden. Man deit hum dat van sien Schuld entlasten? Of ik gah futt na Amnesty International. Man ik will nu utscheien mit Schellen. Mi hett ja nüms mit Arg um mien eerst Wiehnachten brengen wullt. Is natürelk en unkommodige Tied, nettakkraat sess Week vör Wiehnachten geboren worden. Un mitkregen hebb ik van de hele Bodel so of so nix. Last hebb ik d’r naderhand nich van hatt.
Ik bün daar ok eerst Jahren later up komen, dat ik um mien eerst Wiehnachtsfest brocht worden bün. Man kann ’t ok so sehn: Dat kann ok sien Vördelen hebben, wenn man ’t as lüttjet Kind noch nich all mitkriegen deit.
Dat Lott van en Taskenuhrdrager
„Kiek, Ulfert is ok daar!“
Anner Tieden
