„Platt maakt“
„Mien Gott, he kann kien Plattdüütsk (mehr)“
Ein Ratsherr, der lange in Ostfriesland lebt und kein Platt versteht – die Geschichte hat Insa Schindler richtig geärgert. Warum, schreibt sie in ihrer Kolumne „Platt maakt“.
Well in de Frömde leven un daar Foot faten will, mutt sük fögen. De Slötel, um de Döör na de neje Welt en Stück open to rieten, liggt in de Spraak. Blot well de Minsken um sük to versteiht un sük sülvst ut- drücken kann, kriggt en Togang to dat Hart van sien Mitminsken un kann dick mit hör worden.
Minsken in uns Kuntrei proten Platt. Dat Plattdüütske höört hier her as Wind un Wellen to ‘t Meer. Man so en Spraak mutt ok pleegt worden. Daarför word en heel Bült up de Been stellt: „Troo di wat, proot Platt!“ heet dat as Bispill elke Harvst, denn „Septembermaant is Plattdüütskmaant!“
Ok de oosterfehntjer Politikers setten sük för hör Platt in. So word hier de leste Raads-Versammeln in ‘t Jahr up Platt ofhollen. Daaröver hett sük verleden Week Manfred Cybalski van de Gröönen upreegt. He versteiht kien Platt. Na vööl hen un her gung dat dann up Hochdüütsk wieder. Na Staatsrechtler Prof. Dr. Thomas Mann is dat rechtens of man mutt hum en Översetter an d‘ Sied stellen, denn de Amtsspraak is bi uns nu ‘nmaal (hoch)düütsk.
Cybalski hett sien Kopp döörsett, he hett weer in de Middelpunkt stahn. Över hum wurr in d‘ Blattje schreven. Man dat is in mien Ogen blot en Pyrrhussieg, en Erfolg, bi de de Winner as de Verleser utsücht. Cybalski stellt sük sülvst en Armoodstüügnis ut. He leevt siet bold veertig Jahren up ‘t Fehn, is in d‘ Gemeendraad, Kreisdag, stv. Landraad un Lidd in d‘ Regionalraad Oostfreesland. Man wo will disse Mann Minsken ut uns Kuntrei vertreden, de he nich versteiht? Wo is he woll in sien Arbeidslevend as Butenhannelsberader in d‘ Baltikum, Russland, Georgien un de Ukraine klaar komen, wenn he sük nich up frömde Spraken inlaten kann? Hett he ok in sien Tied in Irland immer en Översetter bi sük hatt?
So blifft för mi de Fraag: Kann of will he nix mit Platt to doon hebben? Denn Platt to lehren is vandage so mackelk as noch noit: Man mutt daarto noch nich ‘nmaal to de Döör ut: Webinaren worden anboden un Vokabels för dat Grundgerüst kann man to elke Tied un Stünn mit de Plattino-App van de Oostfreeske Landskupp lehren. Dat köst blot en bietje Interess, Tied un Meite.
Viellicht kann hum ja een van sien Raadskumpels dat olle Leed van Knut Kiesewetter översetten: „Mien Gott, he kann kien plattdüütsk (mehr)“ un hum so to ‘t Pauken brengen. Hopentlik fangt he daarmit noch unner d‘ Wiehnachtsboom an! In disse Sinn wünsk ik Jo en mooi Wiehnachtsfest.
Platt maakt Harten open
En Fuuljes van Knakenbreker
