„Platt maakt“
Dat Lott van en Taskenuhrdrager
Mit Armbanduhren ist das so eine Sache - gerade bei Langschläfern. Wilko Lücht trägt deshalb eine Taschenuhr. Warum das auch nicht unproblematisch ist, erzählt er in seiner Kolumne.
Siet ruugweg fievuntwintig Jahr draag ik en Taskenuhr, un dat hett ok en heel besünner Grund: As ik noch na d’ School gung, weer ik, wat mien Slaaprhythmus angung, en Uul. Dat heet, froh upstahn full mi stuur. Un vör all Dingen harr ik to Schooltieden smörgens nich de Benüll, mi en Armbanduhr umtoleggen. Harr ik hum elke Nacht vör ’t Inslapen ofleggt, harr ik ’t seker haast alltied vergeten, hum anner Dag Mörgen weer antoleggen. Man ik leggde ’t d’r gaar nich up an un truck mien Armbanduhr gaar nich eerst ut. Man wenn ’n de Armbanduhr nooit ofleggen deit, is dat ok nich mooi.
Ik doch daaröver na, wo ik to disse Bredullje utkweem, un leet mi en Taskenuhr to Wiehnachten schenken. Dat weer um 1999 to. De kunn ik an mien Büxtaske klemmen, un wenn ik mien Büx wesseln dee, denn klemmde ik mien Taskenuhr de Avend vördeem um, un klaar was d‘ Keeske. So holl ik ’t bit vandaag.
Nu is dat eerste Probleem van en Minske, de up sien Taskenuhr anwesen is: Up d‘ Uhr kieken fallt en bült mehr up as bi en Armbanduhrdrager. Man glückelkerwies kann ’n sük behelpen: Fakentieds hangen Klocken an de Wand, of een kickt up anner Lüü hör Armbanduhren.
De Lüü, up de hör Armbanduhren een kickt, düren natürelk nich to wied wegsitten. Of hör Uhren mutten besünners groot wesen, man dat is ja al langer nich mehr in Mood. Wenn ’n heel vööl Glück hett, kickt ’n ok tegen en Kark- of Raadhuustoorn mit en Klock an. Wenn kien „externe“ Klock dicht bi is, denn helpt anners nix as raden (so as „Wennehr hebb ik för ’t leste Maal up d‘ Klock keken? Wo laat weer dat do? Wovööl Tied is sietdeem vergahn?). Of an de Sünnenstand ofkieken, wo laat dat is. Geiht natürelk ok nich alltied – mag ’t daaran liggen, dat ’n nettakkraat nich na buten kann, of dat kien Sünn schienen deit.
Nu mag sük de een of anner fragen: Waarum noch en Tastkenuhr in dat Jahr 2022? Waarum överhoopt noch en Uhr, wenn wi doch so of so all Smartphones to Hand hebben? Klaar, so en Smartphone, daar kann ’n wiss en bült praktische Saken mit anstellen. Man ik för mien Deel mag ok nich heeltieden van dat Dingerees ofhangig wesen. Daarum hebb ik mien Smartphone ok nich alltied d’rbi. Mien Taskenuhr woll, de is ja fast an mien Büx fastklemmt. Un dat sall ok so blieven.
Van d‘ Campingwagen na ’d Weltruum
Wo traditionell is de Gallmarkt?
Waar is de Schandaal?
