„Platt maakt“
Maakt dat Best d’r ut
Tanken ist teuer – wer weiß das nicht? Welche Konsequenzen Insa Schindler daraus zieht, beschreibt sie in ihrer Kolumne.
Mama büst du mall? 100 Euro un de Tank is noch nich full? Waarum tankst du hier?“ Mien Söhn kann sük achtern up sien Kinnersitz bold nich weer bedaren. As ik hum verklaren will, dat 2 Euro för en Liter Diesel upstünds „billig“ is, versteiht he de Welt nich mehr.
Man he begrippt, dat sien Reis na Oostfreesland düür worden is. För genau 40 Jahren hett „Markus“ in dat Leed „Ik will Spaaß“ sungen, dat Benzin ruhig 3,10 DM kösten kunn. Well harr docht, dat umgerekend 1,53 Euro för uns in disse Dagen en Spottpries was!
Um disse Spöök uttowieken, helpt blot Eens: Dat Auto mutt so faken as mögelk stahn blieven! So nehmen mien Mann un ik nu meesttieds dat Rad, wenn wi inkopen willen. In en lüttje Anhanger passt allens, wat wi in een Week verbruken.
Ok de een of anner Padd to lopen, bütt sük an. Dat deiht nich blot uns Knippke un uns Klima good. Dat helpt besünners uns sülvst. Well rüst, de rust. Well to vööl up sien Mors sitt, schaadt sien Rüggbeen, sien Muskels, Sehnen un Gelenken. Nich selten liddt he dann unner Rüggpien. En bietje Bewegen wirkt daartegen as en wahre Gesundpütt: Well as Bispill elke Dag twintig Minüten löppt, verbetert sien Utdüür, kann ofschalten, baut so Stress of un kann sien Bregen in Swung brengen.
De Dörblöden un Verdauen profiteren daar ok van. Dat Risiko, en van de Volkskrankheiden as Bloodhochdruck of Zucker to kriegen, word düdelk minnerseert.
Well sien Swienhund Füür unner de Achtersten maken will, helpt vielleicht en Fitnessuhr. De gifft dat all för minn Geld to kopen. Se tekend elke Tree up, de man an en Dag torügg leggt un tellt tosammen, wo vööl Kilometers daarbi tosammen komen. Dat Resultaat drifft een villicht an, d’r of un to noch en Tree d’rbi to doon.
Bewegen kann in Sellkskupp Spaaß maken. Van mien Arbeitsstee word dat upstünds mit en besünner Weddbewarv fördert: Koppels van dree Kollegen sammeln över fiev Weken hör Treden, de se in disse Tied lopen bünd. Na een gode Week harren de 68 Koppels, de mitmaken, all en Strecke van Hannover bit na d’ Noordpol un torügg överwunnen. Wi bünd all gespannt, wo vööl Kilometers insgesamt tosammen komen.
So fit, dat wi mit uns Kinner na Oostfreesland lopen können, um hör Groot-ollen to besöken, worden wi seker so gau nich. Man wenn de Corona-Laag dat tolett, reisen wi in Tokummst seker faker mit de Bahn. Villicht möten wi daarför bold blot noch 9 Euro betahlen. De Idee, de Priesen för Bussen un Bahn in disse Tieden so billig to maken, is wunnerbaar. Man wat nützt een dat up ’t Land, waar de opentlike Verkehrsverbinnens to ’t Blarren bünd?
Homer un de Oostfresenkrimis
König of Bedelmann?
En Teken för Blau-Geel
König van Düütskland – Flöök of Segen?