„Platt maakt“ En Kaartje för ‘t Blöden
Das 9-Euro-Ticket spaltet die Gemüter. Wilko Lücht erklärt in seiner plattdeutschen Kolumne, warum er nicht viel davon hält.
Bus-un-Bahn-Texten sünd alltied wat problematisch, daarum hebb ik ok nich faken över Bus un Bahn schreven. Problematisch daarum, umdat ‘t alltied so mackelk is, wat to quesen un rachen to finnen. Well nich mit ‘t Auto wieder weg un ok nich in en Grootstadt fahren will, de kann sünner de Düütske Bahn nich to. Feernverkehrs-Alternativen fahren ja meesttieden blot daar, waar ‘t wat to halen gifft. Un wat een an Geld tegenöver de Düütske Bahn sparen deit, dat verlüst he an Tied.
De Düütske Bahn hett up de meeste Strecken noch dat Monopol. Well en Monopol hett, de kann egenlik nix recht maken. He is alltied to düür, denn dat gifft kien, de billiger is. De Service is alltied to slicht, umdat nüms en beter Service anbeden deit. De Infrastruktur is möör un word nich gau noog verbetert. De Autoindustrie hett de beter Lobby, un de Bahn hett dat Nasehn. Un denn kummt de Bahn ok noch alltied to laat.
Un wat fallt de Politik in disse Situation in? En Negen-Euro-Ticket, dat mehr Lüü mit Bus un Bahn fahren sölen. De Bahn hett woll seggt, dat sullen mehr Bahnen fahren, wenn dat Negen-Euro-Ticket kummt. Man of dat tolangen deit? Na mien Dünken harr de Bund dat Geld, waar he dat Negen-Euro-Ticket mit finanzeren deit, ehrder in de möre Infrastruktur investeren sullt – daar harren wi all up langer Sicht mehr van hatt.
Dat Negen-Euro-Ticket sall blot för dree Maant gellen. Un wat kummt denn? „Du kannst de Lüü gau wat anwennen, man slecht weer ofwennen,“ seggt mien Tant alltied. Well anners nooit Bahn fahren hett un sük to negen Euro in d‘ Maant Pauschaalpries wennen deit, de blifft de Bahn doch seker nich troo, wenn Bahnfahren weer düürder word.
Dat gifft ja Lüü, de willen, dat all dat, wat nödig bruukt word, generell umsünst wesen sall. För de sünd negen Euro in d‘ Maant för d‘ Bahn ok noch to düür. Sülkse Lüü bölken mit Sekerheid noch feller, wenn de dree Maant um sünd. Un de, de geern dreeuntwintig Euro up Dag för en Regionaalfahrkaart betahlt hebben, de laten ‘t för de token dree Maant amenn noch na, umdat se bang sünd för Bahnen vull as Gört. De Pandemie is ja ok noch lang nich vörbi!
Lang Proot, körte Sinn: De Bund pumpt Geld in billige Fahrkarten, wieldes de Infrastruktur an alle Hoken un Ennen blöddt. Dat Negen-Euro-Ticket is man doch blot en Kaartje för ‘t Blöden.
Deepwaterfisken redden de düütske Binnenstadt!
Well bruukt denn sowat?
Wenn dat Loog man en Naam hett
