„Platt maakt“ En Fuuljes van Knakenbreker
Wer Urlaub auf Ischia Urlaub macht, sollte auf seinen Rücken achten – rät Wilko Lücht in seiner Kolumne. Denn bei Rückkehr nach Ostfriesland könnte aus Rücken- schnell Herzschmerz werden.
Fredag, 13 Ühr, Wekenenn un Urlaubsbegünn! Nu man to un gau in d‘ Fleger na Ischia! Sien Kollegen in d‘ Firma, de kunnen hum maal fein . . . de Rügg freeihollen! Man he hull sük ok sülvst de Rügg freei, of beter de Nack: Dat Sömmerurlaubsgeföhl sull ja upkomen, un daar sünd Kragens un Schaals ja blot in d‘ Weg!
Un denn ok noch överall Ärkondischn, also de hele Tied Zogg in d‘ Zug (un ok in d‘ Fleger). Un sovööl mehr, as he utsteeg! Un daar natürelk gau ok de överge Plünnen van ‘t Levend (bit up de Baadbüx – wi hebben ja Maneren)! He harr ja Urlaub!
Man denn: Een Ischia is up Stee, twee Ischias doon blot noch sehr. Nu bestunn för hum Schuulplicht! Man nich to knapp! He hett Lehrgeld betahlt; Schuulgeld weer hum lever west! Well wat ut ‘t Lidd hett, de liddt. Sien Ollske harr hum ‘t heeltied vörqueest: Röög di! Man he röögde sük kien Spier. Wo groot weer nu sien Lengen na Sehnen, de hullen, wat se versproken.
Un doch smeet he sük nich up Bedd, nee, he smeet ‘t up ‘t Fieren. Lumumba un Lambada – de hele Nacht. Man dat gung de verkehrt Kant an: Denn up disse Avend mutt hum en Katt tomöötkomen wesen.
Katten sünd ja – besünners in düüstern – gau Hexen. In disse Gefall Hexen mit Waffenschien – Hexen, de up de Rügg van unschüldige Minsken scheten. Wat en Wunner ok, sien Kollegen hullen hum ja blot bi d‘ Arbeid de Rügg freei. Of anners: Tovööl Lumumba un Lambada gifft Lumbago, Hexenschööt.
Weren wi doch blot in Huus bleven, wull he al in de Steernnacht bölken, man he besunn sük. Denn ok in ‘t egen Land is ‘n vör Pien nooit seker. Verleden Jahr weren se an de Mosel fahren. Un umdat he dat daar so langwielig funn, greep he daar to deep in de Zucker-Laa. Un van de hele Zuckerlaa, de he daar funn, kreeg he in Bernkastel Kuus-Kellen.
Un nu mussen se för ‘t tweede Maal de Urlaub ofbreken, umdat he nich mehr kunn. Denn he muss nu gau na d‘ Knakenbreker, un de gifft ‘t ja blot in Oostfreesland. Man he troode sük nich allennig. Sien Ollske muss mit. As he an d‘ Rieg weer, reep de Knakenbreker nich hum in sien Kamer, nee, sien Ollske! Un se doch gaar nich daaran, daar weer ruttokomen, ut de Kamer! Well harr denn daarmit rekent, dat de Knakenbreker ok noch en Hartenbreker wurr, doch he. Un so stunn he daar mit sien Beck vull Tannen. Man he besunn sük weer un doch: Nu gau Beck dicht, anners hest du weer Kuuskellen. Un well weet, up wat för Ideen de Kusendokter kummt!
Klever un clever is nich datsülvige
Wat he’ wi lacht bi de Witzen van d’ KI
Doo, wat du wullt – de Lüü poten doch
