„Platt maakt“ König van Düütskland – Flöök of Segen?
Würde in Deutschland mit einem König alles besser laufen? Mit der Frage befasst sich Insa Schindler in ihrer plattdeutschen Kolumne.
Vivaldi hören de hele Dag, de Lottotahlen een Week vörher verraden, de hele Dag Robert Lemke kieken, verbeden, dat Socken un Autos stinken, reisen un Schampus drinken . . .. Dat allens hett sük Rio Reiser in de 1980er vörnohmen, wenn he König van Düütskland wurr – tominnst hett he daarvan sungen.
Eenmaal König to wesen, eenmaal in ’t Rampenlücht to stahn, eenmaal antoseggen, waar allens lang gahn sall, well dröömt daarvan nich? Wat kunn man as König na de olle Welt mit en Kroon up d’ Kopp un en Zepter in d’ Hand nich allens utrichten? Wi bruukden kien Politikers mehr, de hör Tied mit överlange Debatten verdoon un dann doch blot Kompromissen torecht kriegen, umdat kien Partei vandaag hör Patentrezept dörsetten kann.
Man kunn eenfach anwiesen, dat Energie för de lüttje Mann weer betahlbaar word. De Macht över wichtige Versörgens, so as dat Transportwesen, de Informationstechnik of uns Waterwarken kunn man an sük rieten un weer in een Hand leggen.
So en König kunn bestimmen, dat de Arbeidsbedingungen in Krankenhusen un Pleeginrichtens düdelk beter wurden, dat disse wichtige un harde Arbeid as Bispill weer angemeten betahlt word un in uns Sellskupp dat Ansehn kriggt, wat se verdeent. Un en König kunn sük daarvör insetten, dat weer genoog Mesters an de Scholen kwammen, daarmit uns Kinner wat lehren.
Man in Düütskland gifft dat all lang kien Monarchie mehr. De leste Kaiser muss 1918 ofdanken. In anner Staten in Europa finnt man noch Königen. Man hör Upgaav besteiht daarin, Haan to schüddeln, Anspraken to hollen of Inrichtens intoweihen.
De Pries, de se daarvör betahlen, is hoch: Noit bünd se för Fotokameras un Presselüü seker, de up de Söök na de nächste Schlagzeile bünd. So wurden ok de eerste 100 Dagen van König Charles III genaustens unner de Lupe nohmen. Wenn sien Penn bi ’t Unnerschrieven leckt, weet dat sien Volk gauer as de Enkert drögen kann. Lohnt sük dat, up so en Upgaav söben Jahrzeihnten to wachten?
Mit dat Amt van een Grötaugust wull sük Prinz Heinrich XIII van Reuß seker nich tofree geven. Daaröver, dat wi noit gewahr worden, wo en Königriek unner sien Regentskupp utsücht, bün ik van Harten blied. Good, dat sien Riek nu blot noch de paar Quadratmeters groot is, de hum in ’t Backje tostahn. Man över sien Drömen blot to lachen, is grundverkehrt: Dat gäärt in uns Volk un dat is kien good Teken.
König of Bedelmann?
Wo traditionell is de Gallmarkt?
Kluntjes & Tee(wust) – all in een Hand
