„Platt maakt“ Klever un clever is nich datsülvige
In seiner Kolumne beschäftigt Wilko Lücht sich diesmal mit Klimaklebern. Weniger kleben, mehr miteinander sprechen ist seine Devise.
Gilg is Vertreder för Mandelmelk. Fröger weer he Vertreder för Golf-Utrüstung, man umdat he de Natur un dat Klima hoogachten deit, hett he up Mandelmelk umsadelt. De Melkburen in sien Loog proten sietdeem nich mehr mit hum.
Bi sien Vertredertouren mutt Gilg faken dör Grootstadtkrüzungen dör. He denkt sük: Uhuu, sull ik woll dör de Krüzungen dörkomen of hett sük d’r weer well an fastkleevt? Man mag ’t nich glöven, man dat kummt so, as Gilg dat wahrschaut hett. De Krüzung sitt dicht van Klima-Klevers. Wo sall ik dat denn weer mien Ollske verklookfiedeln?, denkt sük Gilg. Se seggt denn seker weer: „Mien Keerl, de pleistert överall so lang, dat he nooit to rechte Tied na Huus kummt.“ Man dat is ja nett annersum! Nich ik pleister so lang, de Klima-Klevers! Tweemaal Pick hatt: Eerstens hebben de Klima-Klevers Pick, denn daarmit kleven se sük an d‘ Straat fast. Tweedens hett Gilg Pick, dat he wegen de Klima-Klevers so laat na Huus kummt un van sien Ollske weer Schellen kriggt.
Mit Gilg will nüms so geern tuusken: Eerst Schellen mit de Melkburen, denn ok noch mit sien Ollske … Man wenn he nu to sien Auto utstiggt un mit en Klima-Klever diskuteren will – denn hett he noch mehr Schandaal. Daarum blifft he in ’t Auto sitten un wacht, bit de Kleveree vörbi is. Man eernsthaft: Demonstreren is en Recht in en Demokratie. Daar kann nüms wat tegen hebben, solang ’t fredelk blifft. Dat kann ’n seker verstahn, dat mennigeen meent, in de Klimapolitik word to minn maakt. Well dat meent, de kann ’n up d‘ Straat gahn un de Partee wählen, de in sien Ogen de beste Klimapolitik maken deit. Man en Protest, de tegen Gesetten verstött, höört sük nich – mag dat Intreden för en anner Klimapolitik ok noch so rechtschapen wesen. Klever un clever is nich datsülvige.
Wat d’r noch bito kummt: In Düütskland word ja al en bült mehr för ’t Klima daan as annerswaar. Man of dat de Plastikinsel in d‘ Pazifik wiss lüttjer maken deit, wenn hiertolann de Plastikpüten verboden worden, daar mag een över strieden. Nettso is dat mit dat Kohlendioxid, wat hier in de Energieversörgen inspaart word un denn över de europäische Emissionshannel sovööl mehr in anner Lannen dör de Schörstenen dampt.
Dat Klima-Thema is een van de stuursten, de ’t upstünd geven deit. Man mit Kleven word ’t na mien Dünken ok nich beter. Minner kleven, mehr mitnanner proten, sull de Devise wesen. Denn harr Gilg, de Vertreder, de ’t doch egenlik elk recht maken will, ok nich so vööl Schandaal van alle Kanten.
Van d‘ Campingwagen na ’d Weltruum
En Fuuljes van Knakenbreker
