„Platt maakt“ De Fehntjers hebben vullkomen gro‘ Foten
Warum hinterlassen Fehntjer eigentlich einen großen Fußabdruck – und ist das gerecht? Mit der Frage befasst sich Wilko Lücht in seiner Kolumne.
Mit mien Ootje hebb ik bi mennig Tass Tee mennig Prootje föhrt. Harr ik hör maal van mien Menen övertüügt, see se alltied: „Daar hest du vullkomen gro‘ Foten!“ Man wat de Schohgrött mit Rechthebben to doon hebben sull, hebb ik nooit verstahn. Denn mit Schohgrött eenunveertig sünd mien Foten gaar nich so groot. So is dat even mit de Seggwiesen.
De een löppt up grote Foot, de anner up lüttje. Un denn gifft ‘t ok noch de Foot, de ‘n nich sehn kann: Ik meen de ökologische Footofdruck, also de, de anwist, wo leep ik mit mien Levensstil in de Umwelt ingriepen doo. Wat dat mit en Footofdruck to doon hett, dat will mi nich so recht in d‘ Kopp. Man so is dat even mit de Seggwiesen.
Autofahrders leven up groter Foten as Footgahners. Well dreemaal in ‘t Jahr na Dubai flüggt, de sien Sporen in d‘ ökologische Tuun sünd breder as van de, de up Sömmerdag nich wieder as na sien egen, reelle Tuun raakt. Dat Kohlendioxid van hunnert Kohjer lett de Buur up groter Foot leven as een, de nich maal en Wellensittich in d‘ Köken hett.
Man wi sünd ja noch nich klaar! Well ut en Industrieland kummt, de hett noch groter Foten: Daar mutt een all dat CO2, wat in de verleden Tied dör Ölje, Köhlen un Törf freeisett worden is, up elke Person runnerreken un bi de ökologische Footofdruck d‘rbitellen. Daar könen baldadig Quadraatquanten bi rutsuren!
Arme Fehntjers! Bi hör mutt een also dat hele Kohlendioxid, wat dör de Törf-ofbau freeisett worden is, up hör ökologische Foten reken. Daar kweem ik as Fehntjer seker nich mit Schohgrött eenunveertig ut!
Ik glööv, wenn ik mien Ootje vandaag wat van mien ökologische Foten vertellen dee, dee se sük ‘t tominnst nipp un nau överleggen, of se mi as wollehr „vullkomen gro‘ Foten“ attesteren dee. Denn wat kann ik Blood daarför, dat mien Vörollen dat Moor kultiveert hebben? Of dat ik in en Industrienation geboren bün? Of dat mien Naber dreemaal in ‘t Jahr na Dubai flüggt?
De ökologische Footofdruck hett sük de Mineraalöljekonzern BP utdocht. He sall egenlik blot de Swarte Peter wiederschuven: Wenn elk en ökologische Footofdruck hett, denn word unnerstellt, elk is sülvst för dat Kohlendioxid verantwoordelk, wat so um hum to produzeert word. Denn sünd nich mehr de grote Konzernen dat fule Beest, man elk un een allennig. Is dat wiss so mackelk? Seker nich.
Man dat heet nich, dat een d‘r nix van hett, wenn he ut egen Initiative sien ökologische Schohgrött en bietje minnerseren deit.
Mooi Geschichten gifft dat ok
Raden up de Straten?
Lücht an, Lücht ut
