„Platt maakt“ Raadlos un mit löss Hannen
Wer wird Deutscher Meister? Karlheinz Harms glaubt, dass die Antwort darauf für manche Leute der Weltuntergang sein könnte.
De bayeriske Footballwelt steiht Kopp un ik kann ’t ok noch heel neet glöven. De Footballers van Bayern München worden dit Jahr (villicht) keen düütske Meister. Verleden Saterdag hebben de doch würkelk dat Kunststück klaarbrocht un tohuus en Footballspööl tegen Leipzig verloren. Un dat an de vörleste Spööldag!
Daarbi stunn doch för all Bayern Anhangers al lang fast, dat ok van ’t Jahr de düütske Footballmeister blot ut München komen kann. Un dat nu al för ’t elvde Jahr nananner!
Wo kunn hör denn nu so wat passeren? De Mannskupp steiht nu blot noch an twede Stee un mutt d’rup hopen, dat de neje Tabellenföhrer, Borussia Dortmund, token Wekenenn sien leste Saisonspööl neet winnen deit. Anners sünd se blot Vizemeister un dat jüst achter Dortmund. Dat is ja för en echten Bayern Fan de Hoogststraaf un is gliekbedüdend mit de Weltunnergang.
Schienbaar is en twede Platz heel nix mehr weert un winnen is alltied Plicht. Blot good, dat ik daar anners over denk un lever för Werder Bremen de Dumen drück, ok wenn de Jungs in de token Jahren seker neet in ’t Rennen um de Meistertitel mithollen könen.
Man nu maal ehrelk, wat is daar los in München? In hör Vereenshistoorje sünd se tweeundartig Maal düütske Meister worden, tolest teihn Maal nananner. Twintig Maal hebben se de DFB-Pokaal mit na Huus nohmen, hebben al de Champions-League, UEFA- Cup un Weltpokaal wunnen un sünd FIFA Club-Weltmeister west.
Dat sünd Erfolgen, waar annern blot van drömen un de se nooit berecken könen. Ok van ’t Jahr wullen de Münchner Vereensbossen weer, dat hör de Spölers dat „Triple“ ut Meistertitel, Pokaalsieg un Champions-League na Bayern halen.
Un daarmit dat Vörhebben blot neet scheev gahn sull, wurr heel un dall unverwacht sogaar de Trainer vör de Döör sett. Man dat is gehörig in de Büx gahn. Daarmit hebben se sotoseggen wall ’n Egentoor schoten, denn de Nafolger kunn de Mannskupp bither neet up de Erfolgsspoor torüggbrengen. Anners kann man sük de infroren Gesichten van de Bayern Vörstännen neet verklaren un wo licht se in Brass komen, wenn se daarup anproot worden.
Beter tominnst de Lüüntje (Meistertitel) in de Hand as de Duuv (Pokaal un Champions-League) up ’t Dack, mag sük de Münchner Anhang de verleden Saison nu noch mooiproten. Man ik glööv, disse lüttje Vögel hett al to ’n Offlüggt in Richtung Dortmund ansett. Dat was doch ok mooi, wenn ennelk ’nmaal weer ’n anner Vereensnaam up de Meisterschaal kummt.
Nu hoop ik blot, dat de Borussen overmörgen, up de leste Meter, neet weer week Knejen kriegen.
Raden up de Straten?
Lücht an, Lücht ut
Alltied fredelk blieven is neet eenfach
