„Platt maakt“ Vööl Bewegen in de Naberskupp
Nachbarn hat man nicht nur zu Hause. In seiner Kolumne erzählt Karlheinz Harms von seinen neuen Nachbarn auf Zeit.
Hier is wat los! Dat is upstünds en Komen un Gahn. Wi kriegen stadig neje Nabers. All Nöös lang muttst du di an neei Gesichten wennen. Well is dat nu weer? Wohnen de nu ok hier? Waar mögen de wall herkomen? Blieven de langer of sullen de villicht in de Naberskupp blot kört to Besöök wesen?
Links tegen uns hebben sük Sönndagvörmiddag ruugweg acht Personen ansiedelt. All sehn hebb ’k hör noch heel neet. Schienbaar delen sük twee Famieljen ut Italien dat lüttje Grundstück an de Eck. Tominnst hebb ik dat Geföhl, dat se van daar unnern komen. Ik hebb vördeem noch nooit anner Landslüü truffen, de sük alltied so luud unnerhollen un daarbi eengaalweg mit de Hannen vör hör Gesichten hen- un herfuchteln.
Maandag hett sük tegen hör ok noch en ollerde Paar ut Österriek daallaten. Man mit de Mann un sien Frau kannst eenfach keen Gespreck in de Gang kriegen. Ik hebb dat faker vergeevs versöcht. De blieven wall lever för sük un willen mit nüms wat to doon hebben. Elk sien Möög! Schraad bi uns tegenover is denn Dingsdag en Famielje ut Bayern ankomen. Vader un Moder mit twee quengelig, halvwussen Wichter. Ok’ n lüttje Dackel un ’n leep groten Schäferhund d’rbi. Ik will blot hopen, dat se de örnlik in ’t Oog hollen un an de Lien nehmen. De Hunnen natürelk.
En Stückje wieder, up de anner Sied van uns Straatje, sünd Middeweek, savends heel laat, twee nederlandske Famieljen ankomen, de nu up de een Sied Sweden un up de anner Sied Norwegers as Nabers kriegen.
Ik segg ja, upstünds geiht ’t d’rbi langs. Un dat haast elke Dag. Langwiel kummt hier neet up. Wi mutten uns al ranhollen un düchtig uppassen, wenn wi mitkriegen wölen, wat um uns to so alls geböhrt.
Dat ik hier neet van to Huus, over uns oostfreeske Naberskupp proot, hett sük de een of anner seker al docht. So internationaal geiht ’t bi uns in d’ Straat denn doch neet to. Nee, wi sünd in Urlaub an de Adria. Up en Campingplatz up de kroatiske Eiland Krk.
Van ’t Jahr sünd wi to ’t eerste Maal vör de Haupt-Feerjentied hier un kriegen mit, wo Minsken ut Düütskland un heel Europa na un na hier anreisen. Heel verscheden Minsken, de sük verhalen willen, fredelk mitnanner umgahn, Rücksicht up annern nehmen un, wenn ’t Nood deit, bi ’t Telt upbauen of Wohnwagen schuven eenfach Hülp anbeden.
Kunn dat doch alltied un overall in de Welt so wesen!
Mooi Geschichten gifft dat ok
Ankomen in de neje Naberskupp
För umsünst un noch to düür
