„Platt maakt“ Antje Insta-Mom
Nicht alle Mütter haben das Zeug zu einer Insta-Mom, stellt Antje Lübben fest. Und das liegt nicht etwa daran, dass sie nichts zu erzählen hätten.
Wenn ik dat Huus schoonmaken doo, denn fallen mi geern maal disse Insta-Moms in. Insta-Moms, dat sünd Moders, de en grote Part van hör Leven in dat Internet unnerwegens sünd. De bi Facebook, Youtube, TikTok un Instagram all dat kunddoon, wat hör so de Dag över geböhren deit un wat se so maken. Wo se Kinnerkamers mooi mit Huusbeddjes inrichten, wo se sük hör Haar torechtmaken, wo se sük hör Ogen sminken.
Dat gifft ok Insta-Moms, de mit anner Minsken hör Tipps för de Huushollen delen. Se wiesen een, wo een Upklevers van Glas of Dören ofkriegen deit, wo de holten Footdeel mooi tinkelt un wo de Fensterschieven sünner Striepen klaar un schier worden. Wat se seker neet so geern wiesen, is, wo faken se so en Saak dreihen mutten, bit de denn ok wat för Instagram döcht. Se wiesen heel seker neet, wo faken se weer anfangen mutten, bit se sük bi dat Proten maal neet verhaspeln un ok neet luudhals anfangen to laggen.
Se wiesen neet, wo se neei weer ansetten mutten, umdat dat jüüst in de Minüüt an de Döör pingeln deit.
Heel seker kriegen wi ok neet to sehn, wo vööl Tied hör dat all kösten deit un wo denn hör Kind dwars dör de Upnahm löppt un röppt: „Mama! Ik kann mien Huusschoh neet finnen!“
Ik stell mi denn för, dat ik ok so en Insta-Mom wesen kunn. Denn kunn ik de Lüü wiesen, wo ik uns Spegels, de de Lüttjen mit Tannkreem insprenkelt hebben, weer schoonkrieg. Ik kunn wiesen, wo ik uns 25 Tupperpotten un Brooddösen akkeraat weer in de Schapp torüggflejen kann. Ik kunn ok wiesen, wo ik de Kluntjepott mit Kluntjes vullmaak un up de Tafel stell.
De süddüütske Insta-Moms deden denn seker sükse Kommentaren daar unner schrieven as: „Oh, Antje, wat deist du daar? Wat is dat denn? Un dat wunnerbaar Dekor!“ Denn kunn ik futt achteran ok noch en Video dreihen un verklaren, wo een rechtschapen Tee maken deit. Mit feinste Koppkes, Rohmlepel, Wulkje un all war daar bi hören deit.
Ja, un in sükse Momenten fallt mi denn in, dat ik gaar kien Insta-Mom-Kledaasje hebb. De Latzbüx fehlt mi to en Bispööl. Denn mark ik ok, dat ik överhoopt kien Tätowerens hebb, de ik bruukbaar in de Kamera hollen kunn. Un dat ik mi mit mien körte Haar ok kien Tüüt updwaueln kann.
Denn is mi en Settje na blarren tomood – un denn gah ik weer in uns Köken un swientje daar dat Ofwaskbecken wieder.
Luud un good
Mien egen Kopp
Wenn Geld noch keen Bedüden hett
