„Platt maakt“ Weltkinnerdag
In ihrer Kolumne beschäftigt sich Wilma Lüken mit dem Weltkindertag. Der wird jedes Jahr am 20. September gefeiert.
„Elke Kind bruukt een Tokummst“ – Dat is dat Motto van de Weltkinnerdag, de güstern, an de 20. September fiert worden is. De Dag word weltwied in 145 Lannen fiert. In Thüringen is dat sogaar en richtig Fierdag. Daardör sullen mehr Familien mit Kinner na Thüringen komen. Hett ok wall funktioneert. In Düütskland un överall finnen Festen und anner Veranstaltens statt, um up de Laag van de Kinner uptomarken. Dat Interesse van de Kinner word in de Politik meesttieds to minn um acht.
Dat Düütske-Kinnerhülpswark un UNICEF fördern mit dat Motto in disse Jahr, dat mehr för de Kinner doon word. Se verlangen, dat sük de Politikers mehr för de Kinner insetten. Elke Kind sall in Tokummst en lebensweert un gerecht Leven verwachten düren. De Folgen van de Corona-Pandemie, de Klimawannel und de Oorlog in de Ukraine belasten de Utsichten van de Kinner. De Klimawannel maakt sük alltied mehr bemarkbaar, un dat is nich licht för uns, un besünners för de Kinner. Well aktuell Problemen hett kann bi dat Telefoon „Nummer tegen Kummer“ unner 116111 of 0800-1110333 Hülp bekomen. Disse Nummer kann man tüsken 14 un 20 Uhr (buten Sönndag) alltied anropen. Dat is en Angebood för Kinner, junge Lüü un ok för de Ollen. Daar kann man mit Lüü spreken, de Raad un Hülp geven. Eengaal of een Problemen hett mit sien Ollen, in de School of mit Missbruuk un elke anner Sörgen, hier gifft dat Raad.
Well in sien egen Kuntrei Kinner helpen will, hett enig Kansen. Faken steiht daaröver wat in de Zeitung. De Kinnergaarns, Kinnerschutzbund un ok Scholen sünd för elke Hülp dankbaar. An de 18. un 19. November hett de Kinnerschutzbund in Leer sien Basar. Well stadig helpen will, de is bei de SOS-Kinnerdörpen un de Kinner-Krebs-Hülp an de rechte Adress. Ok dat Düütske-Kinnerhülpswark, de Hartenwunsk un vööl anner Organisationen setten sük alltiet för de Kinner in.
De weltwied Dag för de Kinner wurr 1952 eerst maal van de IUWC – internationaal Verenigung för de Kinner – vörslaan. De Vereende Nationen hebben 1954 de Weltkinnerdag in ‚t Levend ropen un de Verantwoorden daarför an de UNICEF överdragen. Disse Dag sall nich blot för de Kinner en Dag mit Spölen un mit vööl Pläseer wesen, he sall ok mehr Upklarens för de Probleme van de Kinner kunddoon.
Wat hett Herbert Grönemeyer all sungen: Kinder an die Macht!
En Teken för Blau-Geel
Novemberelend
Daardörslippt
