„Platt maakt“ Wat Arbeid weert is
19 Prozent Mehrwertsteuer in der Gastronomie – ist das fair oder nicht. In Cornelia Naths Kolumne ist das ein Streitthema für Lissi und ihre Mutter.
„Ik finn dat nich up Stee, dat se de Mehrwertstüür för ’t Eten in Restaurants weer up 19 Perzent hoogsetten willen“, seggt Lissi an hör Moder. „Anner Minsken in Europa hebben dat Eten hoger in d‘ Reken as wi Düütsken“, gifft Meta to bedenken. „Italieners, Franzosen of Spaniers mutten in Restaurants leep düür betahlen, man dat is hör dat weert.“
„Dat mag ja wesen, Ma, man wi sünd en Famielje mit veer Personen“, hollt Lissi daartegen. „Lukas un ik gahn beid arbeiden. Wenn ’t eng word, mutten wi ok maal eten gahn könen, sünner dat wi gliek 100 Euro quiet sünd.“ „Dann haalt jo doch eenfach en Pizza, daar worden ji ok satt van“, meent Meta.
„Super Vörslag!“, seggt Lissi un verdreiht de Ogen. „Dat is ja ok en heel gesund Eten: Wittmehl Papp mit Gemüüs ut en Blickdöös!“ „Wenn ji fein Eten gahn willen, dann köst dat even sien Geld. Ji verdenen ja beid rechtschapen, un wenn ji keen Tied hebben to koken, mutten ji daarför betahlen. Wat wullt du denn, Wicht? Dat annern di de Arbeid ofnehmen, man daar nix för kriegen? Ik hebb ok arbeidt un doch elke Dag för jo kookt“, seggt Meta mit Nadrück.
Lissi word so sachtjes vergrellt: „Du hest aver ok blot halv Dagen arbeidt, un Oma hett di hulpen. So löppt dat vandaag nich mehr. Un butendeem: Kannst du mi maal verklaren, waarum de Pizza ut de Supermarkt blot mit 7 Perzent bestüürt word, un in ’t Restaurant sölen daar 19 Perzent up komen?“ „In ’t Restaurant komen daar Dennstleistens un en bült anner Kösten bi, de mit dat Eten nix to doon hebben“, seggt Meta. „Man up en Eten, wat du bi ’t Restaurant köffst to mitnehmen na Huus, sölen blot 7 Perzent Mehrweertstüür berekent worden.“
Lissi hett keen Lüst mehr up de hele Diskussion. „Weetst du wat, Ma? Ik glööv, du büst woll de eenzig Minske in heel Oostfreesland, de will, dat de Staat mehr Stüren kriggt. Un du büst echt ollerweltsk mit de Stolt up dien Kokeree!“ Meta antwoordt heel bedaart: „Un weetst du wat, mien Wicht? Ik glööv, de mackelk Tieden, waar annern uns för minn Geld bedenen, sünd vörbi. De Minsken willen rejell betahlt worden. Mi geiht dat heel neet um de Stüren. Man en Betahlen, waar de Minske van sien Arbeid nich van leven kann, of Arbeidstieden, waar keen Famieljenleven of Freeittied mehr mögelk is, dat is för mi modern Slaveree. Wenn du wullt, dat annern di Arbeid ofnehmen, dann betahl hör daar anstännig för. Un wenn di dat to düür is, muttst woll sülvst ran.“
Wieder so of wat Neeis proberen?
Wiehnachtsmarkt – Wiehnachtsglück?
Rentnersörgen
