„Platt maakt“
En Teken för Blau-Geel
Wie kann man Kindern den Krieg in der Ukraine erklären? Mit der Frage befasst sich Insa Schindler in ihrer plattdeutschen Kolumne.
Faxenmaker, Himmelsförsker of Hexenmester? Dat was de Fraag, mit de wi uns lest Wekenenn befaat hebben. Uns Kinner hebben sük van Harten freit, dat se in d’ School ennelk weer Fasching fieren dürsen. Spölen, Danzen, Faxen maken un Slickereen insammeln stunn Maandag up hör Stünnenplaan. Vörfreide up de Tied na Corona kunn man spören.
De Oostfresen könen faken nich vööl mit disse verrückte Dagen anfangen. In anner Kuntreien geiht dat daartegen hoch her: Umzüge trecken dör de Straten, de Lüü maskeren sük, fieren tosammen un maken sük över elk un een lüstig. Man mit Blick up de Krieg in de Ukraine is völen dit Jahr de Smaak an ’t Fieren vergahn. Well kann malljagen, wenn en paar hunnert Kilometers wieder Minsken tegenanner angahn?
In Köln hett man daarum de Karnevalsumzug dör en Demonstation för de Free utwesselt. 250.000 Minsken hebben so en Teken för hör Mitgeföhl för de Ukrainer sett. De Biller van all de Demonstanten – völ daarvan in blau un geel – wassen andonelk.
Ok dat Hochgeföhl van uns Kinner is gau verflogen: „Mama, gifft dat bold de darde Weltkrieg?“ was dat eerste, wat ik van mien Dochter Dingsdag höört hebb. De Krieg in de Ukraine geiht nicht an uns Kinner vörbi. In ’t Radio, Kiekkast un in ’t Internet – överall word daaröver proot.
Man wo sall man sien Kinner verklaren, wat upstünds up de Welt geböhrt, wenn een sülvst de Worden fehlen? In d’ Olldag proberen wi hör mit up de Padd to geven, dat elk van de beiden de glieke Rechten un Plichten hett, dat man deelen mutt un dat man sien Tegenöver mit Respekt behanneln mutt.
Waarum dürt Putin as grote Staatsmann so ut de Rieg dansen? Waarum trappelt he de Regels för dat Tosammenleven van Minsken mit sein Föten? Sien egen Land is doch groot genoog! Waarum kriggt he de Hals nich full?
För mi is dat wichtig, dat mien Kinner weten, wat upstünds passeert, ok wenn hör dat trürig maakt un se völe Fragen hebben, för de ik kein Patentrezept paraat hebb. Totogeven, dat de Groten ok nich immer allens weten, is würkelk kien Schann. Kinner möten hör Sörgen ofladen können un daaröver proten dürden.
Hülp word ok up de Internetsieden van „De Sendung mit de Muus“ un de Kinnernarichten „Logo“ anboden. Informationen un Tosammenhangen worden hier up kindgerechte Wies utnanner puult. Daar können ok de Groten noch en heel Bült lehren.
Ik hoop, dat ok Putin gau noch wat daarto lehrt, he to Verstand kummt un weer Free in de Welt inkehrt.
Naderhand – wennehr is dat?
Gebuursdag un Geschenken
Wat he’ wi lacht bi de Witzen van d’ KI
Well kann man noch troen?