„Platt maakt“ „Kiek, Ulfert is ok daar!“
Es gibt verschiedene Gründe, die einen um den Schlaf bringen können. Einer hat ein Gesicht, weiß Wilma Lüken zu erzählen.
Mit dat Slapen is dat ja so ’n Saak. Mööi is een ja faken, man dat heet noch lang nich, dat man ok good slapen deit. Kuum liggst du in ’t Bedd, fangt dien Kopp an to denken. Seker, he hett dat ok al vörher daan, man snachts gifft dat nix, wat oflenken deit.
Denn maakt man sük Sörgen, wat anner Dag to verwachten is, wat mutt toeerst klaar un wat kann noch ’n bietje wachten. Heel leep is dat bi mi, wenn ik ’n Reis vörhebb. Wat will ik noch besörgen un wat mööt ik noch to Huus klaarkriegen? Well gifft mien Blömen Water un well haalt de Post ut de Breevkasten? Un denn kummt dat Inpacken van de Kuffer. Hebb ik ok alls inpackt, wat ik unnerwegens bruken doo, un is tohuus alls versörgt? Hunnert Gedanken lopen denn dör mien Kopp un de Slaap will nich komen.
Wenn ik denn doch inslapen bün, drööm ik faken, wat ik alls vergeten hebb un dat ik mit dat Inpacken van d‘ Kuffer nich klaar worden bün, dat ik de Tog of de Fleger verpassen doo – un vööl anner Malöör.
Faken drööm ik de glieke Drööm, de Kuffer is nich klaar, of ik krieg nich alls mit, wat mit moot. Man denn hebb ik mi heel fast vörnohmen, elke Avend vör ’t Inslapen, dat ik alltied de Kuffer en Dag in vörut klaar maken dee. Un dat hett würrelk funktioneert. Daarna hebb ik haast kien „Kufferdrööm“ mehr hatt. Ok gifft dat Lüü, de in enig Nachten van elke Maant nich good slapen. Se seggen, dat hett mit de Vullmaan to doon. Övermörgen is dat ja weer ’nmaal sowied. Na mien Menen, kann dat nich mit de Maan to doon hebben, wenn dat in d‘ Slaapkamer düüster is. Ok dat Haar sall beter wassen, wenn ’t bi d‘ ofnehmende Maan sneden word. Un mit dat Ofnehmen sall dat to disse Tied ok beter henkomen.
De Wetenskupp sücht dat ja ehrder kritisk. Man de Psychologen proten van „de sük sülvst wahr makende Gedachten“ un ’n Spreekwoord seggt, de Gloov kann Bargen versetten. Enig Lüü richten sük bi ’t Tuuntjen ok na de Maan un sünd de Overtügen, dat alls beter wassen deit. Elke Buur hollt dat seker mehr mit disse Seggwoord: Daar mutt düchtig Mess unner, denn helpt Gotts Segen – of de Maan – ok.
Vör Jahren was mien Swegermoder savends bi uns. Wi satten tosamen bi ’n Koppke Tee un do see se up ’nmaal as se ut ’t Fenster keek: „Kiek, Ulfert is ok daar!“ Nu weet ji seker, well se meent hett. Kiekt de Vullmaan övermörgen in ’t Gesicht, faken sücht he ut as ’n Ulfert.
Wat he’ wi lacht bi de Witzen van d’ KI
Woordentellen mutt ok maal wesen
De Fehntjers hebben vullkomen gro‘ Foten
